Azken 60 urteetan, 1,2 ºC igo da Pirinioetako tenperatura. Berotze globalaren bizkortzea dela eta, eta COVID-19aren pandemia-egoerak krisi klimatikoaren aurka batera jardun behar dugula erakusten duenez, Pirinioetako lurraldeak ahalegin handiagoa egiten du, eta aurrea hartzen, Europan ikuspegi bakarra zabalduta: Klima Aldaketaren Pirinioetako Estrategia (EPiCC) berrestea, mendikoa eta mugaz gaindikoa.

Aurkezpena 2021eko abenduaren 13an egin zen, Pirinioetako Lan Elkartearen (PLE) XXXIX. Osoko Kontseiluan. Topaketan, elkartea osatzen duten zazpi lurraldeak bildu ziren euren presidenteekin, azken urtean egindako ekintzak berrikusteko eta lurraldeak etorkizunerako dituen erronkak identifikatzeko.

Testuinguru horretan, Eva García Balaguer Behatokiko koordinatzaileak honako hau iragarri zuen Osoko Kontseiluan: «2022an ekintzara pasako gara! Pirinioetako lurraldeak gero eta gehiago jasaten ditu klima-aldaketaren orbainak, eta, horregatik, PLEko zazpi lurraldeek lankidetzan jardutea erabaki dute, mundu mailako erronka horrek Pirinioetako gizartean, sektore ekonomikoetan eta ekosisteman dituen ondorioetara egokitzeko, Klima Aldaketaren Pirinioetako Estrategia berretsita».

PLEk eta OPCCk garatu dute EPiCC PLEren Pirinioetako Estrategiaren esparruan, eta Pirinioetako zazpi lurraldeak bost lankidetza-eremu handiren inguruan bildu nahi ditu, klima-aldaketaren aurkako borrokan elkarrekin lan egiteko.

Premisa horrekin, eta POCTEFA OPCC ADAPYR proiektuko kideei esker, Klima Aldaketaren Pirinioetako Estrategia lurraldearekin lotuta pentsatu da, eta 300 parte-hartzaile baino gehiago bildu zituen prozesu parte-hartzaile luze baten emaitza da. Funtsezko neurriak zehaztean oinarritzen da, batez ere, Pirinioak erresilienteagoak izan daitezen klima-aldaketarekiko, honako hauei dagokienez: klima, naturagune erresilienteak, biztanleria eta lurraldea, mendiko ekonomia egokitua eta gobernantza; guztira, lehentasunezko 72 ekintza biltzen ditu, eta 2030era arteko urteetan aplikatu beharko dira.